Астрономска слика на денот

Откриј го космосот! Дневна слика за астрономијата и астронаутиката со кратко објаснување од астрономите.

20 мај 2026

Темната Волчја Маглина

Kredit za sliku & autorska prava: William Vrbasso
Text: Keighley Rockcliffe (NASA GSFC, UMBC CSST, CRESST II)

Објаснување: Темен волк лежи во Gum. Не, ова не е загатка! Денешната слика ја прикажува Темната Волчја Маглина (Sandqvist–Lindroos 17), мистериозен облак од прашина сместен во маглината Gum 55 (RCW 113) во соѕвездието Скорпија. Иако прашината за нас често е непријатност, во вселената таа има клучна улога во создавањето услови за раѓање на ѕвезди. Темниот Волк ја впива силната ултравиолетова и видлива светлина што ја испуштаат младите ѕвезди во Gum 55, а потоа повторно ја зрачи на подолги, главно инфрацрвени бранови должини. На тој начин се спречува високоенергетската светлина да го загрее гасот во овој регион. Кога некој облак од гас ќе стане доволно студен, гравитацијата ја презема главната улога и предизвикува гасот да се собира сè додека не се роди нова ѕвезда. Прашината не е само меѓуѕвезден термостат, туку и место каде што поединечните атоми на водород се спојуваат во молекуларен водород — основниот градежен материјал за ѕвездите. Наизглед мрачниот Темен Волк всушност е предвесник на космичкиот живот.