Астрономска слика на денот

Откриј го космосот! Дневна слика за астрономијата и астронаутиката со кратко објаснување од астрономите.

20 февруари 2026

B93: Темен меѓуѕвезден дух

Кредит за слика & авторски права: Christian Bertincourt; Text: Keighley Rockcliffe (NASA GSFC, UMBC CSST, CRESST II)

Објаснување: „Дух во Млечниот Пат…“ вели Кристијан Бертенкур, астрофотографот зад оваа впечатлива слика на Барнард 93 (B93). Како 93-ти запис во Каталогот на темни маглини на Барнард, B93 се наоѓа во Малиот ѕвезден облак во Стрелец (Месије 24), каде неговата темнина остро се издвојува наспроти светлите ѕвезди и гасот во позадина. На некој начин, B93 навистина наликува на дух, бидејќи содржи гас и прашина што биле распрснати од смртта на ѕвезди, како што се суперновите. B93 изгледа како темна празнина не затоа што е празен, туку затоа што неговата прашина ја блокира светлината што ја испуштаат подалечните ѕвезди и светлечкиот гас. Како и другите темни маглини, дел од гасот во B93, ако е доволно густ и масивен, со време ќе се згусне под дејство на гравитацијата и ќе формира нови ѕвезди. Доколку тоа се случи, кога тие ѕвезди ќе се запалат, B93 ќе се преобрази од темен дух во блескава лулка на новородени ѕвезди.