Објаснување:
Оваа глетка беше вредна за станување рано од кревет. Пред нешто повеќе од четири години, кометата C/2020 F3 (NEOWISE) изгреа пред зората, на големо задоволство на љубителите на северното небо кои биле будни во тој раен час. Станувајќи пред изгрејсонце на 8 јули, фотографот успеа на драматичен начин да ја овековечи една од ретките комети видливи со голо око во овој век – натрапник од внатрешниот дел на Сончевиот Систем, кој стана познат како Големата комета од 2020 година. Видеото го прикажува изгревот на кометата NEOWISE над Јадранското Море, снимен од Италија. Ова видео со забрзано прикажување (time-lapse) комбинира повеќе од 240 фотографии направени во текот на 30 минути. Кометата е прикажана како изгрева на позадината на далечни ѕвезди, додека во преден план се гледаат светли и брановидни ноќни светлечки облаци. Кометата NEOWISE остана неочекувано сјајна повеќе од еден месец, а се покажа дека нејзините опашки од јони и прашина потекнуваат од јадро со пречник од околу пет километри.
