Unicornis, Pellis Vulpina et Arbor Natalicia

Credita imaginis et iura auctoralia: Michael Kalika

Explicatio: Regio stellarum nascentium, quae numero NGC MMCCLXIV adscribitur, haec compositio interstellaris gasi et pulveris, et pulchra et multiplex, circiter duo milia et septingentos annos lucis distat in pallida sed imaginosa constellatione Monocerotis, Unicorni. Spectata versus aequatorem caelestem et prope planum Viae Lacteae nostrae, haec scaena temporum miscet nebulas emissionis rubentes, a lumine valido stellarum recens natarum excitatas, cum obscuris nubibus pulveris interstellaris. Ubi autem hae nubes obscurantes iuxta stellas calidas et iuvenes iacent, lumen stellarum etiam reflectunt, unde nebulae reflexionis caeruleae oriuntur. Re vera stella clara et variabilis S Monocerotis in centro nebulae caeruleo tinctae immersa est. Stellae NGC MMCCLXIV, simplici figura triangulari supra S Monocerotis dispositae, vulgo Arbor Natalicia appellantur. Ad apicem huius arboris cosmicae nebula Coni, lumine stellarum sculpta, inversa sedet; sub arbore autem convoluta et pulverea pellis gasi et pulveris micantis Pellis Vulpina nominatur. Haec dives tabula telescopica circiter unum et dimidium gradum caeli complectitur, id est tres plenas lunas a summo ad imum, quod ad distantiam NGC MMCCLXIV fere octoginta annos lucis respondet.

Imago crastina: Transitus extrasolaris

Pagina originalis: Astronomy Picture of the Day

Auctores et curatores: Robert Nemiroff (MTU) & Jerry Bonnell (UMCP)
Officialis NASAe Amber Straughn Iura specialia valent.
NASA Retis Privata, Accessibilitas, Monita;
Officium ab ASD apud NASA / GSFC,
NASA Scientiae Activatio
& Michigan Tech. U.

COTIDIANA APOD INTERPRETATIO IN LATINUM CLASSICUM, SCIENTIAM RECENTEM CUM PATRIMONIO LATINO CONIUNGENS.
Pro NASA APOD in linguam Latinam vertunt: Marcus Aurelius Manilius & Dipl.Ing.Dr. Liliana Gracanin
-- UNIVERSAE INTERPRETATIONES APOD LILIANAE GRACANIN --
Gratias ago pro auxilio technico
APOD Crew & Saša Gračanin